Sewe sportfederasies in die Sentrale Karoo-distrik het onlangs 'n gesamentlike totaal van R785 000 van die Wes-Kaapse Departement van Kultuursake en Sport ontvang om hul bedrywighede en ontwikkelingsprogramme te ondersteun. Die Wes-Kaapse Minister van Kultuursake en Sport, Ricardo Mackenzie, het die tjeks tydens 'n seremonie in Prins Albert op 15 Mei oorhandig. Raadslid Neville Claasen het die Minister en sy span verwelkom.
Minister Mackenzie het die toewyding van diegene wat op grondvlak werk, geprys: “Ons voortgesette ondersteuning vir sportfederasies gaan nie net oor befondsing nie – dit gaan oor die erkenning van die mense agter die skerms wat hul tyd en energie gee om sport in ons provinsie te laat groei. Hul toewyding aan goeie bestuur en nakoming is presies waarom die privaatsektor bereid is om met die Wes-Kaapse Regering saam te werk aan inisiatiewe wat ons gemeenskappe bevoordeel,” het hy gesê.
Die befondsing sal federasies in staat stel om effektiewe bedrywighede te bedryf, kompetisies aan te bied en transformasie binne hul onderskeie sportkodes te bevorder. “Sport is meer as net kompetisie. Dit bring mense bymekaar, bou gemeenskappe en skep geleenthede – veral vir ons jeug,” het Minister Mackenzie bygevoeg.
